Leikfélag Hafnarfjarðar

Ný og endurbætt heimasíða!

2007-03-20T18:04:00.000Z

Búið er að opna nýja heimasíðu Leikfélags Hafnarfjarðar. Þar er m.a. hægt að skoða myndir frá starfinu, fréttir, sögu leikfélagsins ofl.

Slóðin er;

www.123.is/lh

Síðustu sýningar á Ráðskonu Bakkabræðra!!!

2007-02-05T16:55:00.000Z

Síðustu sýningar á Ráðskonu Bakkabræðra eru:

Laugardaginn 10. febrúar kl 20.00
Sunnudaginn 11. febrúar kl 20.00 UPPSELT

Föstudaginn 16. febrúar kl 20.00 LOKASÝNING

Hægt er að panta miða í síma 551-1850 eða 848-0475 og á netfanginu leikfelagid@simnet.is
Sýnt er í gamla Lækjarskóla sem stendur við Tjarnarbraut í Hafnarfirði.

Fleiri sýningar á Ráðskonu Bakkabræðra

2007-01-22T16:37:00.000Z

Í desember frumsýndi Leikfélag Hafnarfjarðar gamanleikinn Ráðskona Bakkabræðra eftir Oskar Braaten. Sýningum verður nú haldið áfram vegna fjölda áskorana. Leikstjóri er Lárus Vilhjálmsson.

Verkið var sett upp í tilefni af 70 ára afmæli félagsins, en var áður á fjölunum hjá félaginu árin 1945 við fádæma vinsældir. Nokkrum árum seinna var það sett upp aftur og þá var ákveðið að sýna það í Bæjarbíó sem tók mun fleiri áhorfendur en Gúttó. Enn létu vinsældirnar ekki á sér standa og ásóknin var svo mikil í miða að fólk gerði sér far úr Reykjavík til að standa í biðröð í tvo, þrjá tíma. Einn sýningargestur sem fór á verkið fimm sinnum hafði á orði að leikritið væri svo fyndið að hláturtaugarnar í honum væru lamaðar eftir sýningu!

Ráðsskona Bakkabræðra fjallar á gamansaman hátt um samskipti þeirra Gísla, Eiríks og Helga við ráðskonuna Gróu sem vill gera endaskipti á subbuskap og slæmum siðum bræðranna. Einnig koma við sögu hin tilfinninganæmi Axel og náttúrubarnið Hildur sem óhjákvæmilega dragast saman. Og eins og í öllum góðum gamanleikjum eru illmennin ekki langt undan og þau gera sínar skráveifur á gamansaman hátt. Ráðskona Bakkabræðra er verk í anda hinna bráðsmellnu dönsku gamanleikja sem skemmtu landsmönnum svo vel á fyrri hluta 20. aldar og má segja að þótt að verkið hafi ekki verið sýnt í hálfa öld hafi sterkasta minni verksins vakað áfram í Soffíu og ræningjunum í Kardemommubænum sem flestir þekkja.

Næstu sýningar verða:
Föstudag 26. janúar
Sunnudag 28. janúar
Laugardag 3. febrúar
Sunnudag 4. febrúar

Sýningar hefjast kl. 20.00.
Hægt er að panta miða í síma 551-1850 eða 848-0475 og á netfanginuleikfelagid@simnet.is.
Sýnt er í gamla Lækjarskóla sem stendur við Tjarnarbraut í Hafnarfirði

Ráðskona Bakkabræðra

2006-10-12T20:53:00.000Z

Samlestrinum sem vera átti akkúrat núna í þessum töluðu orðum var frestað til mánudagsins 16. október kl. 20:00 í Gamla Lækjarskóla. Vonandi hafa allir fengið boð um þetta í tæka tíð... reyndar veit ég að Arnar fékk þau ekki og biðst aftur afsökunar á því.

En sumsé, hver verður Ráðskona Bakkabræðra???

Kemur allt í ljós,
Kveðja´
Þórunn Gréta

Kæru krúttpjakkar!

2006-09-16T20:08:00.000Z

Nú er leikárið 2006-2007 gengið í garð.

Ákveðið var að byrja leikárið á því að flikka aðeins upp á húsakynnin okkarog hafa tiltektar og vinnudag miðvikudaginn 20. september frá klukkan 17:00og bara þangað til allt er búið. Svo ef einhverjir komast ekki stundvíslega klukkan fimm er honum velkomið að kíkja seinna. Svo þarf heldur ekkert aðvera allan tímann. Bara koma og hjálpast að og heilsa upp á mannskapinn.

Fyrrihluti aðalfundar var haldinn 24. júní sl. Þær breytingar urðu á stjórnskipulagi að Halldór Magnússon og Gunnar Björn Guðmundsson sem verið höfðu í varastjórn véku úr stjórn og í þeirra stað voru kosin þau Hildur Evlalía Unnarsdóttir og Júlíus Freyr Theódórsson. Í aðalstjórn sitja Ingvar Bjarnason (formaður), Dýrleif Jónsdóttir (gjaldkeri), Þórunn Gréta Sigurðardóttir (ritari), Lárus Vilhjálmsson (meðstjórnandi) og Hildur Kristmundsdóttir (meðstjórnandi). Rakel Mjöll Guðmundsdóttir heldur sínu sæti í varastjórn.

Boðað verður til framhaldsaðalfundar á þessari síðu og með tölvupósti innan skamms.

Svo er margt spennandi á dagskrá vetrarins þannig að ég hvet alla sem vilja vera vel upplýstir um starfsemi félagsins að:

a) lesa tölvupóstinn sinn
b) sjá til þess að ritari stjórnar sé ávallt með nýjasta tölvupóstfangið á listanum sínum (nokkuð hefur borið á að tölvupóstur komi endursendur með meldingu um að þetta netfang sé ekki til lengur...)
c) fylgjast með þessari síðu
d) hafa samband við einhvern stjórnarmeðlim eða skrifa athugasemd hingað á síðuna ef viðkomandi hefur áhuga á því að ganga í félagið eða vera á póstlistanum

Gaman saman og trillirí sagði lóan og fór til útlanda.

Hlakka til að sjá ykkur,
Þórunn Gréta

Leiklistarnámskeið í firðinum!

2006-04-30T12:53:00.000Z

Við höfum fengið til okkar leikstjóranema frá Hollandi sem ætlar að halda hjá okkur námskeið næstu 8 vikurnar. Það sem hann ætlar að kenna er best sagt í hans eigin orðum (vona að það fyrirgefist að þetta sé á ensku en það er svona lausleg þýðing eftir hverjum lið.

Class outline

1 Introduction and beginning with subject: space ( rými)
2 awareness of space, creating it in minnimal acting with big effort, space in relation to each other (unnið með rými og nærveru)
3 working on scenes, with the things from last lesson ( senur - unnið með rými )
4 Personage, character. The buildup and creation of a personage by you your body in stead of mind ( byggja persónur með líkama í stað huga/hugsunar )
5 going on with personages (perónur áframhald)
6 improvisation with the clown as a start ( trúðsleikur )
7 improvisation with personage and space. Play with the changes and the effects of all the actions ( persónur og rými )
8 Working on something what the group would like. This can be a master of the method I work with. The Lecog method. ( frjálst efni )

Þetta verða 8 vikur í allt, tvö skipti í viku. Námskeiðið kostar 4.000 kr fyrir þá sem eru í leikfélaginu en 12.000 kr fyrir þá sem eru utan félags. Fyrsti tíminn er á þriðjudaginn í næstu viku klukkan sjö.

Planið er að kenna þriðjudaga frá sjö til tíu og laugardaga frá ellefu til tvö næstu átta vikur. Fyrir ykkur sem eruð í prófum og megið engan tíma missa þá var hugmyndin að hafa annað styttra námskeið að prófum loknum. Þegar / ef af því verður þá verður það tilkynnt á næstunni.

Þeir sem hafa áhuga á að taka þátt endilega svarið þessum pósti eða hringið í mig 8967478 og látið vita. Það eru 12 pláss laus á þetta fyrsta námskeið.

Kveðja,
Yðar einlæg stjórn LH

P.s. þetta er frábær náungi og þetta verður án efa alveg frábært námskeið !! Endilega látið þetta berast því námskeiðið er öllum opið en auðvitað reynum við að manna það fyrst og fremst með félögum í LH :-)

Partý

2006-04-30T12:50:00.000Z

Jæja, þar sem nokkrir villingar ákváðu að skella sér til Kúbu þá var ákveðið að endurtaka frumsýningarpartýið fyrir Hodja þegar tækifæri gæfist og helst að gera enn betur !!! Af þeim sökum ætlum við að hittast upp í leikfélagi á sunnudagskvöldið næsta ( 30 apríl ) og taka þétt á því ( áfengi optional auðvitað :-)

Mæting um áttaleytið og opið hús þangað til nágrannarnir senda á okkur lögguna. Ekki seinna vænna því þau eru víst að flytja hvort sem er og svo er að koma sumarfrí :-D
Sjáumst hress á sunnudaginn !

Ingvar

P.s. eftir því hvernig liggur á mér þá getur vel verið að ég kynni ykkur fyrir nýju áhugamáli .... sjóböðum ... þar skilur á milli karlmenna og aumingja... kvenna með hár undir höndum og hinna. ;-)

Rás eitt eða ekki neitt!

2006-04-12T10:56:00.000Z

Þórunn Gréta og Siggi voru í barnaþættinum Vitanum á Rás 1 í gær. Hér má hlusta á afraksturinn í allt að því hálfan mánuð. Njótið vel og gleðilega páska.

Mogginn og Hodja

2006-04-12T10:52:00.000Z

Hrund Ólafsdóttir, gagnrýnandi frá Mogganum skrifaði þetta um sýninguna... til gamans má geta þess að margir hafa það fyrir satt að Mogginn ljúgi aldrei.

Höfundar leikgerðar eftir sögu Ole Lund Kirkegaard: Ingvar Bjarnason og Þórunn Gréta Sigurðardóttir. Leikstjóri: Ármann Guðmundsson. Tónlistarstjóri: Snæbjörn Ragnarsson. Leikmynd: Finnbogi Erlendsson og Ingvar Bjarnason. Búningahönnun og leikgervi: Dýrleif Jónsdóttir. Ljósahönnun: Kjartan Þórisson. Frumsýning í Gamla Lækjarskóla, 25. mars 2006

ÆVINTÝRALEG barnasýning með fallegum búningum, fyndnum gervum, töfrum þrunginni leikmynd og lýsingu ásamt skemmtilegri, lifandi tónlist er afrakstur útmánaða hjá Leikfélagi Hafnarfjarðar. Metnaður og hlýja einkennir afar góða leikgerðina og umgjörð sem unnin er af listfengi.
Hodja er lítill drengur í Austurlöndum nær, sonur skraddara nokkurs sem vill láta drenginn vinna og læra iðnina. Hodja vill hins vegar skoða heiminn og fær til þess leyfi móður sinnar eftir að honum áskotnast fljúgandi teppi. Skemmst er frá því að segja að drengurinn þarf ekki að fara langt til þess að komast að því að ekki eru allar manneskjur góðar og glaðar eins og heima hjá honum.
Leikstjóri og höfundar leikgerðar hafa fyrst og fremst dregið fram skýra eiginleika persónanna ásamt húmor í stóru og smáu. Þar eiga reyndar söngtextarnir stóran þátt, sem og sérstaklega áheyrileg tónlistin sem hljómsveit og leikarar fluttu listilega. Hvort tveggja er samið af tónlistarstjóranum, hljómsveitinni og leikhópnum.
Leikararnir stóðu sig með prýði og var þar fremstur í flokki drengurinn Sigurður Jóel Vigfússon sem lék Hodja sjálfan af fallegri einlægni. Hjalti Stefán Kristjánsson lék föðurinn og fleiri hlutverk af iðandi kátínu og léttleika ásamt því að vera liðtækur í hljómsveitinni og Rakel Mjöll Guðmundsdóttir lék og söng móðurina af einstöku öryggi. Aldís Gyða Davíðsdóttir lék Rottuna, hinn svikula, sjálfhælna og heimska mann sem rænir teppinu af Hodja, af prýðis listfengi og kryddaði leik sinn með alls kyns fyndnum uppátækjum. Ragnar Ólafsson lék nokkur hlutverk og lék á gítar og var mjög góður sem Grimmi, fangavörður soldánsins. Soldáninn sjálfan; akfeitan, grimman, kátan og sjálfumglaðan lék svo Halldór Magnússon; hinn faglegi reynslubolti Hafnfirðinga. Margir aðrir leikarar og tónlistarmenn stigu á lítið sviðið sem rúmaði svona makalaust vel stóran og framandi ævintýraheim sem verður áreiðanlega mörgum ungum áhorfendum eftirminnilegur um langa hríð.

Hrund Ólafsdóttir

Hodja í smásjánni

2006-04-06T12:09:00.000Z

Hér má sjá hvað gagnrýnandinn Sesselja frá leiklist.is hafði um sýninguna að segja.

2006-03-24T15:14:00.000Z

Hodja frá Pjort

2006-03-24T15:12:00.000Z

Þá er komið að því! Leikfélag Hafnarfjarðar frumsýnir laugardaginn 25. mars kl 17:00 barnaleikritið Hodja frá Pjort eftir Ole Lund Kirkegaard. Leikstjóri er Ármann Guðmundsson. Leikgerð eftir Þórunni Grétu Sigurðardóttur og Ingvar Bjarnason.

Hodja er ungur strákur frá smábænum Pjort í Búlgóslavíu. Hann dreymir um að ferðast og skoða heiminn en gengur illa að láta þann draum sinn rætast þrátt fyrir einlægan vilja. Einn daginn kynnist hann fjörgömlum teppavefara sem lánar honum fljúgandi töfrateppi. Hodja flýgur á því af stað í langþráð ferðalag til fjarlægra landa og lendir í fjölmörgum ævintýrum, hittir meðal annarra skúrkinn Rottu og spikfeitan soldán sem gerir menn höfðinu styttri.

Hönnun leikmyndar er í höndum Finnboga Erlendssonar og Ingvars Bjarnasonar. Dýrleif Jónsdóttir sá um hönnun búninga og leikmuna. Ljósahönnuður er Kjartan Þórisson og tónlistarstjóri er Snæbjörn Ragnarsson. Leikritið er sýnt í nýjum húsakynnum félagsins í gamla Lækjarskóla og er gengið inn um aðalinngang að framanverðu. Leikritið verður frumsýnt laugardaginn 25. mars kl 17:00 en næstu sýningar eru sunnudaginn 26. mars, laugardaginn 1. apríl, laugardaginn 8 apríl og sunnudaginn 9. apríl. klukkan 14:00 alla dagana. Upplýsingar um sýningar og miða fást í síma 848-0475. Athugið að frítt er fyrir Hafnfirðinga á þriðju sýningu 1. apríl samkvæmt venju meðan húsrúm leyfir.

2006-03-02T12:54:00.000Z

Vill einhver leika?

2006-02-20T15:02:00.000Z

Okkur langar svo í fleiri leikfélaga. Leikhópurinn æfir og æfir en nú er svo komið að okkur sárvantar fleira laghent og hugmyndaríkt fólk til að aðstoða okkur við leikmyndasmíð, leikskrá, plakatshönnun, kynningarmál og fleira tilfallandi.

Áhugasamir hafi samband við Ingvar, ingvarbj@centrum.is eða Þórunni Grétu, thgret@gmail.com

Sjáumst!

Vinur Leikfélags Hafnarfjarðar

2006-02-12T12:01:00.000Z

Um þessar mundir endurnýjar Leikfélag Hafnarfjarðar gömul kynni við þennan ágæta mann, Ole Lund Kirkegaard. Árið 1985 sýndi félagið leikritið Fúsa froskagleypi eftir Kirkegaard í leikstjórn Viðars Eggertssonar við miklar vinsældir. Nú í haust voru liðin 20 ár frá því Fúsi var frumsýndur og því ekki úr vegi að ráðast í annað verk eftir sama höfund. Hodja og töfrateppið varð fyrir valinu, en sú saga fjallar um lítinn strák sem fer í ævintýraferð á fljúgandi teppi. Leikstjóri verksins er Ármann Guðmundsson, en Ingvar Bjarnason og Þórunn Gréta Sigurðardóttir unnu handritið upp úr bókinni. Æfingar eru þegar hafnar og vinna við leikmynd og búninga í þann veginn að hefjast.

Gleðskapur

2006-01-31T20:16:00.000Z

Jæja, leikfélagar allir, stórir og smáir, gamlir og nýir!

Næsta föstudag, 3. febrúar, ætlum við að halda partý í Haukshúsi, sem er staðsett við golfvöllinn á Álftanesi. Húsið opnar kl. 19:00 og við sjálf sjáum um að skemmta okkur eins og okkur einum er lagið fram á rauða nótt. Jafnvel fram í rauðan dauðann.

Sjáumst!
Þórunn Gréta

Hin endanlega lokasýning

2006-01-24T21:46:00.000Z

Leikfélag Hafnarfjarðar gefur nú einn lokamöguleika á að sjá Hina endanlegu hamingju eftir Lárus Húnfjörð með því að hafa aukasýningu næstkomandi sunnudag, 29. janúar, kl. 20:00 í gamla Lækjarskóla í Hafnarfirði. Miðaverð er kr. 1000,- en miðapantanir eru í síma 848 0475.

„Hin endanlega hamingja“ er annað verk Lárusar Húnfjörð sem Leikfélag Hafnarfjarðar tekur til sýninga. „Þið eruð hérna“ sem félagið sýndi sumarið 2003 er af mörgum talið eitt athyglisverðasta verk sem hefur verið sýnt í promenade stíl hér á landi um árabil. Leikendur í sýningunni eru 13 talsins. Margir þeirra eru að stíga sín fyrstu skref á fjölunum en aðrir hafa mikla reynslu að baki. Hönnun lýsingar er í höndum Kjartans Þórissonar, Kristín Arna Sigurðardóttir hannar leikmynd og Dýrleif Jónsdóttir hefur yfirumsjón með búningagerð. Leikritið verður sýnt í húsakynnum félagsins í gamla Lækjarskólanum. Sýningin hentar ekki fyrir fólk með innilokunarkennd eða trúarbragðafælni.

Það er víst að áhorfendum var komið á óvart á frumsýningunni og alveg áreiðanlegt að leiksýning þeirra á fáa sína líka. Lárus Vilhjálmsson er vaxandi leikskáld og leikstjóri með næmt auga fyrir áhrifamætti leikhússins og spennandi að fá meira að sjá frá honum í framtíðinni.
Hrund Ólafsdóttir, Morgunblaðið.

Ytri umgjörð er ágæt og leikmyndin er mjög vel heppnuð og skapar skemmtilega stemmningu fyrir sýninguna. Hinni endanlegu hamingju tekst að viðhalda áhuga áhorfenda enda kraumar undir einhver spenna sem heldur athyglinni allan tímann.
Hörður Sigurðarson, leiklist.is

Eins fannst mér leikskáldið Lárus hafa skemmtilega þroskuð tök á óhefðbundnu og ólínulegu forminu sem hann velur sér.

Eins er sviðssetningin snurðulaus og umgjörðin jafn nosturslega rétt og maður er farinn að gera ráð fyrir hjá Hafnfirðingum þegar þessi gállinn er á þeim.
Þorgeir Tryggvason http://varrius.blogspot.com

Kær kveðja
Þórunn Gréta

Hamingjan og Hodja

2006-01-20T15:54:00.000Z

Í kvöld, föstudaginn 20. janúar verður aukasýning á Hinni endanlegu hamingju og hefst hún kl. 21:00.

Á morgun, laugardaginn 21. janúar verður æfing fyrir Hodja og töfrateppið kl. 12:00 í gamla Lækjarskóla og eru allir sem vilja taka þátt hvattir til að mæta og gefa sig fram við Ármann leikstjóra.

Kveðja
Þórunn Gréta

Gleðilegt nýtt ár!

2006-01-09T09:52:00.000Z

...og takk fyrir það liðna.

Leikfélag Hafnarfjarðar tekur nú upp þráðinn að nýju. Næsta verkefni, Hodja og töfrateppið e. Ole Lund Kirkegaard, er að fara í gang og verður fyrsti fundur kl. 20:00 annað kvöld í gamla Lækjarskóla. Leikstjórinn, Ármann Guðmundsson, mun kynna verkefnið. Allir velkomnir og allir vinir þeirra líka. Nóg pláss fyrir nýtt fólk!! Hafnfirðingar eru boðnir sérstaklega velkomnir, en þeir fara að verða sjaldséður minnihlutahópur í félaginu...

Kveðja,
Þórunn Gréta

2005-12-09T11:20:00.000Z

Í gær var gaman í leikfélaginu. Salurinn var fullsetinn á sýningunni og bróðurparturinn af áhorfendunum voru fyrrverandi félagsmenn LH. Hluti af leikhópnum hljóp svo eftir sýningu í búningunum sínum niður í Fjörð, en sjálfstæðismenn í Hafnarfirði höfðu pantað hjá okkur skemmtiatriði yfir jólahlaðborðssnæðingnum sínum. Þeir hlóu og klöppuðu og við hlupum aftur upp í Lækjarskóla til að drekka kaffið sem Lalli og Tolli höfðu hellt upp á með makkintosinu. Svo söfnuðust nýir og gamlir félagar saman á kaffihúsi í Firðinum og höfðu það náðugt fram eftir kveldi.

En á sýningunni var einnig hinn margfrægi leikhúsrýnir, Varríus og hér má sjá hvað hann hefur um sýninguna að segja.

Á laugardaginn láta leikfélagar svo að sér kveða í jólaþorpinu við Fjörð, en þá um kvöldið verður næstsíðasta sýning.

Þá er einnig rétt að geta þess að ákveðið var að hafa aukasýningu föstudaginn 16. desember kl. 20:00, sem fyrr í gamla Lækjarskóla.

Miðapantanir eru í síma 848 0475.

Sigrum í hamingju,
Þórunn Gréta

Rýni til gagns

2005-12-07T10:09:00.000Z

Er hún það ekki annars, gagnrýnin? Hrund Ólafsdóttir mætti á frumsýningu og skrifaði þennan dóm sem birtist i Morgunblaðinu í morgun.

Hafa Hafnfirðingar fundið hamingjuna?

Hin endanlega hamingja
Höfundur og leikstjóri: Lárus Vilhjálmsson. Tónlistarstjórn: Þórunn Gréta Sigurðardóttir. Ljós: Eva Lind Oliversdóttir. Búningar: Dýrleif Jónsdóttir. Leikmynd: Kristín Arna Sigurðardóttir. Frumsýning í Gamla Lækjarskólanum 26. nóvember 2005.

LEIKSÝNINGAR þar sem áhorfendur er látnir taka þátt eru ekki algengar hér á landi. Nú hefur hið öfluga Leikfélag Hafnarfjarðar sett upp þriðja verk sitt í þessum dúr. Höfundur og leikstjóri, Lárus Vilhjálmsson, var einnig höfundur og annar leikstjóra fyrsta verksins en það hét Þið eruð hérna. Þar voru áhorfendur látnir taka þátt í atburðum sem gerðust á mörkum tveggja heima og svo er einnig nú. Það má ekki segja of mikið um hvað gerist eða hvar þar sem stór hluti af upplifun áhorfenda er að þeim er komið nokkuð á óvart en sýningin er vissulega bæði frumleg og forvitnileg.

Í stuttu máli gerast atburðirnir inni í einhvers konar helgidómi þar sem einhvers konar sértrúarsöfnuður er kominn saman yfir líki leiðtoga síns. Bróðir leiðtogans hefur tekið við stjórninni ásamt eiginkonu sinni og þeim til aðstoðar er siðaverndari. Söfnuðurinn þylur söngva og bænir um hamingjuna en hin látni leiðtogi Freysteinn hefur búið til trúarbrögð sem eiga að leiða hópinn til hinnar endanlegu hamingju. Einnig hefur hann búið til athafnir sem eiga að flytja hann sjálfan til hinna sjö heima upphafningarinnar. Sjálfur fylgist hann með fólki sínu úr öðrum heimi. Það tekst mæta vel hjá Lárusi og leikhópnum að leiða áhorfendur inn í seiðmagnað andrúmsloft trúarathafnar þar sem heilaþvegið fólk hrífst með leiðtogum sínum. Leikmyndin er sérstaklega falleg og viðeigandi og lýsingin sömuleiðis. Það besta við verkið er þó byggingin en farið er fram og til baka í tíma með því að láta persónurnar ræða við Freystein í huga sér. Auðvitað kemur í ljós að ekki er allt sem sýnist og heilaþvotturinn hefur ekki náð til allra auk þess sem Freysteinn sjálfur er ekki allur þar sem hann er séður. Breytingar á tíma og rúmi eru gerðar með ljósabreytingum og heppnast það afar vel. Í fremur staðbundnum senum sem helgast af athöfninni er það Freysteinn framliðinn sem tengir persónurnar með eðlilegu flæði. Framvindan var heldur hæg á köflum en þar má kenna frumsýningarstressi um. Þó að margt komi á óvart er annað í textanum hefðbundið þegar horft er til viðhorfa og fordóma. Sýningin var samin á æfingatímabilinu; í spunavinnu með hópnum sem rannsakar eðli sértrúarsafnaða og eðli mannskepnunnar. Sýn hópsins virðist vera svört en lokin koma á óvart.

Halldór Magnússon er reyndasti leikari félagsins. Hann lék Freystein afburða vel með því að sýna flest stig tilfinningalitrófsins en ánægjulegast var að sjá hann njóta sín í upphafinni heiðríkju þess sem trúir að hann hafi hlutverk á jörðinni sem útvalinn sonur Guðs. Ingvar Bjarnason lék Sigurmar bróður Freysteins mjög vel; hann var góður og blíður, heilaþveginn en ruglaður í ríminu vegna yfirgangs konu sinnar sem var einnig vel leikin af Elvu Dögg Gunnarsdóttur. Elínborgu, ekkju Freysteins lék Kristín Helgadóttir á einstaklega afslappaðan hátt og Fjólu Rós dóttur þeirra lék Rakel Guðmundsdóttir einnig vel. Kristín Rós Birgisdóttir lék Andreu siðaverndara en hún er ein af efnilegri leikkonum Hafnfirðinga. Hópurinn var góður í heild en hér verður líka að nefna píanóleikarann Hallgerði sem leikin var af Þórunni Grétu Sigurðardóttur.

Það er víst að áhorfendum var komið á óvart á frumsýningunni og alveg áreiðanlegt að leiksýning þeirra á fáa sína líka. Lárus Vilhjálmsson er vaxandi leikskáld og leikstjóri með næmt auga fyrir áhrifamætti leikhússins og spennandi að fá meira að sjá frá honum í framtíðinni.

Hrund Ólafsdóttir

PS. Nú eru aðeins tvær sýningar eftir, annað kvöld og laugardagskvöld. Það er orðið uppselt á sýninguna annað kvöld en nokkur sæti eru laus á laugardagskvöldið.

Frumsýningum fylgir gagnrýni

2005-11-28T14:54:00.000Z

http://leiklist.is/index.php?option=com_content&task=view&id=369&Itemid=74 Hér má sjá hvernig Herði Sigurðarsyni, gagnrýnanda fyrir leiklistarvefinn, leist á frumsýninguna.

Sagði
Þórunn Gréta

Frumsýning við Lækinn.

2005-11-23T09:54:00.000Z

Leikfélag Hafnarfjarðar frumsýnir
Hina endanlegu hamingju eftir Lárus Húnfjörð

Leikfélag Hafnarfjarðar frumsýnir laugardaginn 26. nóvember leikritið “Hin endanlega hamingja”. Höfundur og leikstjóri er Lárus Húnfjörð.

“Hin endanlega hamingja” var unnin og skrifuð á æfingatímabilinu.

Freysteinn, andlegur leiðtogi Helgidóms hinnar endanlegu hamingju er horfinn á brott. Mun söfnuðurinn jafna sig á þessu áfalli? Tæklar Sigurmar nýja hlutverkið sem leiðtogi? Heldur Elínborg, ekkja Freysteins sönsum? Er Ingunn kona Sigurmars sátt við sitt hlutskipti? Eru Herlaugur og Fjóla dóttir Freysteins trúlofuð eða ekki? Kemur tónlistarstjórinn Hallgerður Ugla til með að halda lagi? Þessum spurningum verður kannski svarað á samkomu í Helgidóminum. Þó getur hugsast að allt öðrum spurningum verði svarað.

“Hin endanlega hamingja” er annað verk Lárusar Húnfjörð sem Leikfélag Hafnarfjarðar tekur til sýninga. “Þið eruð hérna” sem félagið sýndi sumarið 2003 er af mörgum talið eitt athyglisverðasta verk sem hefur verið sýnt í promenade stíl hér á landi um árabil.

Leikendur í sýningunni eru 13 talsins. Margir þeirra eru að stíga sín fyrstu skref á fjölunum en aðrir hafa mikla reynslu að baki. Hönnun lýsingar er í höndum Kjartans Þórissonar, Kristín Arna Sigurðardóttir hannar leikmynd og Dýrleif Jónsdóttir hefur yfirumsjón með búningagerð.

Þetta er fyrsta verkefni Leikfélags Hafnarfjarðar á þessu leikári. Leikritið verður sýnt í húsakynnum félagsins í gamla Lækjarskóla í Hafnarfirði. Athugið að sýningin hentar ekki fyrir fólk með innilokunarkennd eða trúarbragðafælni.

Sýningar verða sem hér segir:

Laugardagur 26. nóvember: Frumsýning
Þriðjudagur 29. nóvember: 2. sýning
Föstudagur 2. desember: 3. sýning
Sunnudagur 4. desember: 4. sýning
Fimmtudagur 8. desember: 5. sýning
Laugardagur 10. desember: Lokasýning

Sýningar hefjast kl. 20:00

Sími miðasölu er 848 0475 og 555 1850.

Opinberun Freysteins

2005-11-16T12:26:00.000Z

Tíminn líður og senn mun Freysteinn verða til sýnis. Þannig lítur planið út:

Laugardagur 26. nóvember: Frumsýning
Þriðjudagur 29. nóvember: 2. sýning
Föstudagur 2. desember: 3. sýning
Sunnudagur 4. desember: 4. sýning
Fimmtudagur 8. desember: 5. sýning
Laugardagur 10. desember: Lokasýning

Frekari upplýsingar um staði og stundir mun birt innan tíðar.
Hittumst í Hafnarfirði.

Kveðja,
Þórunn Gréta

Freysteinn afturgenginn

2005-11-11T10:43:00.000Z

Í gærkvöldi var sem sagt rennt í fyrsta skipti frá byrjun til enda. Meginástæða þess að ekki var hægt að gera það fyrr var sú að endirinn var óskrifaður þangað til einmitt í gær... a.m.k. fékkst Lalli ekki til að afhenda okkur hann fyrr en í gær. Þannig að nú höfum við heilt leikrit og vísi að leiksýningu sem við munum föndra með næstu vikur og síðustu helgina í nóvember stefnum við á að hafa hana fullföndraða og alla enda frágengna.

Vanstillta píanóið er nú orðið vel stillt svo tónlistin er öll orðin ómblíðari. Búningameistarar, ljósameistarar og leikmyndameistarar vinna hörðum höndum að því að klæða söfnuðinn og að lýsingu og byggingu helgidómsins.

Tolli ku vera hið efnilegasta módel.

Gerður átti sextugsafmæli í gær og kom með hlaðborð af tertum og gúmmulaði á æfingu í gær. Til hamingju enn og aftur og takk fyrir veittar velgjörðir.

Svo er það bara að sjá hvernig málin þróast í framhaldinu... þróunin fram að þessu hefur öll verið hin forvitnilegasta.

Kveðja,
Þórunn Gréta

Af Freysteini

2005-11-04T22:59:00.000Z

Víst er um að margt hefur dregið til tíðinda í helgidómnum og Freysteini er hætt að lítast á blikuna. Gunnar Björn meðtók þríundarvitund í gærkvöldi og sagði mér sjálfur í dag að hann hefði fyllst hamingju er hann lagðist til hvílu um kvöldið.

Aðstandendur Freysteins hafa það annars harla gott saman og sjá um þessar mundir furðuheim taka á sig furðulega mynd. Um daginn var gleðskapur mikill haldinn og í ljósi nýrrar syndleysisstefnu leikfélagsins hrærðu Ingvar og undirrituð vöffludeig og tóku á móti gestum með nýbökuðum vöfflum, rjóma og sultu að ógleymdu eðalkaffinu frá Te og kaffi úr nýju eðalkaffikönnunni sem jafnframt er frá Te og kaffi. Te og kaffi er ljómandi kaffibrennsla, til húsa í Hafnarfirði, að sjálfsögðu. Að vísu tóku einhverjir syndarar með sér veigar og dreyptu á, en í miklu hófi þó og allt fór friðsamlega fram eftir því sem ég best veit. Leikurinn í þetta skiptið reyndist mér svo erfiður að ég gafst upp á miðri leið, eini þátttakandinn að því er virtist sem þótti reyna um of á lærvöðva mína. Lalli fann ráð við því og tók upp armbeygjuregluna. Vöðvarnir ættu því að vera búnir að taka við sér fyrir frumsýningarpartýið... kannski ég ætti að mæta aðeins oftar of seint á æfingar til þess að þurfa einhvern tíma að taka armbeygjur... nú eða stunda bara líkamsrækt reglulega og borða bara spínat.

Þannig að í Hafnarfirði er gaman og sérlega gaman að sjá ný andlit og gömul. Kíkið á okkur í Lækjarskólann, á æfingaplaninu hér fyrir neðan má sjá hvenær við erum á staðnum að föndra leikrit, leikmynd, lýsingu og búninga. Sé einhver að lesa sem hefur ekki hitt okkur áður, veit ekki hvert hann á að snúa sér en langar að skyggnast bakvið tjöldin er þeim hinum sama velkomið að hafa samband við Lalla leikstjóra, larusv@internet.is eða Þórunni Grétu, thgret@gmail.com. Allar hendur, allir fætur, allir hausar vel þegnir og hjartanlega velkomnir .... að ógleymdum mórölskum stuðningi, af honum er aldrei nóg.

Að endingu skora ég á Ingvar að blogga og birta um leið myndirnar úr gleðskapnum góða.

Ljúfar kveðjur,
Þórunn Gréta

Æfingaplanið fram að frumsýningu

2005-11-04T22:42:00.000Z

Laugardagur 5. nóv. kl. 10:00: Tolli, Hera, Guðrún Sóley, Ragna
Sunnudagur 6. nóv. kl. 10:00: Allir
Mánudagur 7. nóv. kl. 20:00: Allir
Þriðjudagur 8. nóv. kl. 20:00: Allir
Miðvikudagur 9. nóv. kl. 20:00: Allir
Fimmtudagur 10. nóv. kl. 20:00: Allir
Föstudagur 11. nóv. Frí - GANGIÐ HÆGT UM GLEÐINNAR DYR
Laugardagur 12. nóv. kl. 10:00: Senur
Sunnudagur 13. nóv. kl. 10:00: Allir
Mánudagur 14. nóv. kl. 20:00: Allir
Þriðjudagur 15. nóv. kl. 20:00: Allir
Miðvikurdagur 16. nóv. kl. 20:00: Allir
Fimmtudagur 17. nóv. Frí - sérstaklega hugsað til þess að læra textann sinn orðrétt aftur á bak og áfram, upp og niður
Föstudagur 18. nóv.: Rennsli
Laugardagur 19. nóv. kl. 10:00: Vinnudagur, leikmynd, búningar og ljós - gaman saman, jahahahá!
Sunnudagur 20. nóv KL. 20:00: Tæknirennsli
Mánudagur 21. nóv: Frí - sérstaklega hugsað til þess að læra textann hjá öllum hinum orðrétt með ljósakjúum.
Þriðjudagur 22. nóv kl. 20:00: Rennsli
Miðvikudagur 23. nóv. kl. 20:00: Rennsli
Fimmtudagur 24. nóv. kl. 20:00: Rennsli
Föstudagur 25. nóv. kl. 20:00 Generalprufa
Laugardagur 26. nóv. kl. 20:00 FRUMSÝNING

Sjá himins opnast hlið

2005-10-23T13:55:00.000Z

Því nú getur hver sem er skráð skoðanir sínar nafnlaust við þær færslur sem honum sýnist. Takið hinni kostulegu kveðju og minnumst fráfarandi formanns með tveggja mínútna þögn.

..."Haglega um höfuð tippum"...

2005-10-20T09:50:00.000Z

Í gær ákvað yfirvald helgidómsins að engum skyldi heimiluð þátttaka í gleðskapnum nema hafa einhvers konar höfuðfat til að verja höfuð sitt fyrir klámfengnum orðum sem gjarnan fljúga í slíkum samkvæmum.

Friður sé með yður, gangið hægt um gleðinnar dyr.
Þórunn Gréta

Allir í ofurstuð

2005-10-19T12:21:00.000Z

Að kveldi föstudagsins næstkomandi verður haldinn gleðskapur fyrir vini, vandamenn og velunnara Freysteins. Húsið opnar upp úr klukkan 20:00. Þeir sem vilja eitthvað sterkara en kaffi, pönnukökur, sultu og rjóma verða að sjá fyrir því sjálfir. Enda Leikfélag Hafnarfjarðar á góðri leið með að verða syndlaust.

Svo er að sjálfsögðu æfing daginn eftir, en hún frestast að öllum líkindum til klukkan 12. En við sjáumst á æfingu í kvöld og jafnvel annað kvöld ef yfirnáttúrulegu öflin lofa.

Sjáumst í Gamla Lækjarskóla,
í nafni syndlausra og samfélags heilagra,
Þórunn Gréta.

PS. Þeir sem vilja vera með mér í blogginu geta fengið lykilorð, bara muna að spara klámið og sorann.

2005-10-14T14:06:00.000Z

Æfingar koma til með að vera sem hér segir út októbermánuð:

Föstudagur 14.okt 20:00 - 22:33 Senur
Laugardagur 15.okt 10:00 - 13:01 Senur
Sunnudagur 16.okt 10:00 - 13:02 Senur
Mánudagur 17.okt 20:00 - 22:30 Senur
Þriðjudagur 18.okt 20:00 - 22:31 Senur
Miðvikudagur 19.okt 20:00 - 22:30 Allir
Fimmtudagur 20.okt 20:00 - 22:33 Senur
Föstudagur 21.okt frí
Laugardagur 22.okt 10:00 - 13:00 Senur
Sunnudagur 23.okt 10:00 - 13:01 Allir
Mánudagur 24.okt Frí
Þriðjudagur 25.okt 20:00 - 22:31 Senur
Miðvikudagur 26.okt 20:00 - 22:32 Senur
Fimmtudagur 27.okt 20:00 - 22:33 Senur
Föstudagur 28.okt 20:00 - 22:34 Senur
Laugardagur 29.okt 10:00 - 13:00 Allir
Sunnudagur 30.okt 10:00 - 13:01 Allir

Gott er að mæta fimm mínutum fyrir boðaðan tíma svo æfingarnar þurfi ekki að standa fram eftir nóttu í hvert skipti

Ef þið sjáið fram á að geta ekki mætt á æfingar eða ef eitthvað kemur uppá eru Lalli, larusv@internet.is og Þórunn Gréta, thgret@gmail.com alltaf til í að fá tölvupóst eða símhringingu til að ræða málin.

Gleðskapnum sem halda átti um helgina hefur verið frestað um viku eða svo... af ástæðum sem mér eru allsendis ókunnugar.

Í nafni Freysteins, hins allra heilagasta,
Þórunn Gréta

2005-10-09T17:15:00.000Z

Æfingaplanið er komið í hús og ég var búinn að skrifa langan, langan pistil en hann hvarf. Mér súrnaði.

Áfram höldum vér

2005-10-06T13:46:00.000Z

Sameinaðir stöndum vér og sundraðir föllum vér. Þess vegna er svo mikilvægt að mæta á æfingar... fyrir utan hvað er gaman að vera saman, allir sem einn.

Næstu æfingar verða sem hér segir

Laugardagurinn næstkomandi kl. 10:00
Sunnudagurinn næstkomandi kl. 10:00

Lalli lofaði að koma með æfingaplan um helgina.

Sagði
Þórunn Gréta ... hin orðheppna - er það ekki annars??? :þ

Áfram höldum vér

2005-10-06T13:41:00.000Z

Sameinaðir stöndum vér og sundraðir föllum vér eins og maðurinn sagði.... þess vegna er svo mikilvægt að mæta á æfingar... fyrir utan það hvað það er gaman að vera saman ;)

Þær næstu verða sem hér segir

Laugardagurinn næstkomandi kl. 10:00
Sunnudagurinn næstkomandi kl. 10:00

Lalli lofaði að koma með æfingaplan um helgina.

Sagði Þórunn Gréta .... hin orðheppna - not.

Áfram heldur Freysteinn

2005-10-03T11:19:00.000Z

Næstu æfingar eru sem hér segir:

Að kveldi þriðjudagsins 4. október kl. 20:00
Að kveldi miðvikudagsins 5. október kl. 20:00

Allir í heiminum velkomnir og vinir þeirra líka.

Komið fagnandi, sem fyrr er okkur að finna í Gamla Lækjarskóla.

Fréttir af Freysteini:

Í gær var tekið viðtal við Freystein og allt hans hyski. Þau voru kölluð í viðtalsherbergið, eitt og eitt í einu og sögðu frá sjálfum sér. Þeim var öllum heitið fyllsta trúnaði svo ekkert verður gefið upp um það sem kom upp úr kafinu í viðtölunum. Hugsanlegt er þó að hægt sé að kynnast þeim örlítið betur með tíð og tíma.

Í nafni LH skrifaði
Þórunn Gréta og minnir á kommentakerfið

Freysteinn gengur aftur

2005-09-30T10:13:00.000Z

Æfing í kvöld kl. 20:00 á sama gamla staðnum. Allir í stuð.

Kveðja
Þórunn Gréta

Aðalfundur og æfingar

2005-09-28T09:54:00.000Z

Hæ hó

Ég minni á aðalfundinn í kvöld kl. 20:00.

Næsta æfing á Freysteini verður föstudagskvöldið næstkomandi kl. 20:00.

Allt í gamla Lækjó.

Kveðja,
Þórunn Gréta
- Ef ég sé með hattinn fer ég örugglega í stuð.

Næsta æfing

2005-09-24T22:24:00.000Z

Næsta æfing á "Freysteinn gengur aftur" verður þriðjudagskvöldið næstkomandi, nánar tiltekið 27. september, daginn fyrir framhaldsaðalfundinn... biðst forláts að mér láðist að setja það með í fyrsta pistilinn.

Kveðja,
Þórunn Gréta
- segi bara eins og leikskáldið spaka, "Þetta er allt að koma"... tölvumálin altso...

Starfsemin hefst

2005-09-24T15:07:00.000Z

Leikárið 2005-2006 fer nú í hönd og verður dagskrá þess kynnt á framhaldsaðalfundi félagsins sem haldinn verður í gamla Lækjarskóla miðvikudagskvöldið 28. september nk. kl. 20:00.

Dagskrá fundarins verður með þessum hætti:

1) Endurskoðaðir reikningar síðasta leikárs lagðir fram til samþykktar
2) Dagskrá komandi leikárs kynnt
3) Önnur mál

Sjáumst undir Hamrinum í Hafnarfirði!